Dem Philipp Jacob, Ulrich und Johann gebrüeder, auch Hanns Ir vetter, die Ladurner, des Landgerichts Meran Ansessen, allen Iren Ehelichen leibs erben, Vnndt derselben Erbens Erben hernachbeschrieben wappen Vnndt clainot:
mit namen ain weisser schildt, Im grund desselben ain von hindern Vndern gegen den obern vorder egg sich auffwerts verlierender grüener Perg erscheinend, Unndt auss desselben grundt ain doppelt auffwachsende, durch den weissen thail des schildts sich mit den baiderseits anhangenden grüenen laub aussbreitende weinreben. Vnndt daran gegen der rechten, Vnndt linckhen Jederseits die gestalt anhangender Zwayer schwarzer weintrauben erscheinend, Auff dem Schild ain Stechhelmb, Zubaiden seiten Mit roth oder rubin, auch weiss- oder silberfarber Helmdeckhen, Vnndt darob derselben farben gewundenem Pausch geziert, darauff widerumb zwischen Zwayen Püffelshörner, deren Mund löcher Von ainander gekhärt, Vnndt auss deren Jeden drey Korn Eher herfür gehend, welche Püfflshörner auch Mit den farben abgetheilt, Als dass Vnnder Vorder, Vnnd hinder ober halb weiss oder silber farb, Vnndt dass Vorder ober vnnd hinder Vnder halb thail Roth oder Rubin farb, auff einem grüenen Pühel ain auffrecht stehender, Vnndt zu baiderseits vber die Püfflshörner sich mit den Zweigen Vnndt blettern ausbreitender oliven baum entspringend, wie dann solch wappen Vnndt clainot in Mitte diss brieffs gemalen.
|
